Article associacion occitana de fotbol

 	Composicion de l’equipa d’Occitània
Mercé als suportaires
Premsa e vidèas  

Entrevistas Deidièr Amiel per Jornalet 

Deidièr Amiel: "Anarem a l’Europeada amb l’ambicion de donar al país nòstre son primièr trofèu dins un tornèg màger" Deidièr Amiel Entraïnaire seleccionaire de la seleccion occitana de fotbòl

L’entraïnaire seleccionaire de la seleccion occitana de fotbòl Deidièr Amiel, a doas escomesas ongan: la Viva World Cup de nacions sens Estat e l’Europeada 2012 de minoritats lingüisticas. Al delà de l’aspècte esportiu, Amiel espera que los occitans prengan consciéncia de la lor seleccion nacionala e anima los fotbolaires del país a i participar activament.

Qual es la tòca de l’Associacion Occitana de Fotbòl (AOF)?

Las tòcas de l’AOF son de promòure las tradicions lingüisticas e culturalas occitanas pendent los eveniments esportius fotbolistics, de far véser l’identitat occitana mercés la practica del fotbòl e de compartir d’encontres e d’experiéncias umanas amb d’autras culturas, lo fotbòl estant encara la pasion comuna e lo vector internacional.

Quina receptivitat a agut l’AOF de la part dels jogaires occitans? Lor agrada jogar amb la lor seleccion?

I a pas gaire de jogaires de nivèl nacional o regional que se sentan occitans. Ai contactat 88 clubs de CFA e DH d’Occitània tota per 1 responsa favorable. Me siái estacat a recrutar de jogaires qu’aimavan lo pais nòstre, sas tradicions, e ara son fiers de far lusir las colors nòstras.

A nivèl esportiu, qual es per vos lo nivèl de la seleccion occitana de fotbòl?

Lo nivel actual de la còla es un bon CFA2. La seleccion es formada amb de jogaires de CFA e dels melhors dels clubs de DH. Tanben n’i a que jogan en PH de district mas que jogaràn en liga regionala.

Cal èsser occitanofòn per far partida de la seleccion? Per rapòrt a la realitat sociolingüistica del país, pòt aquel fach nòire als jogaires occitans que voldrián jogar mas que, malastrosament, sabon pas parlar la lenga d’òc? « Fasèm tot çò qu’es posible per que los jogaires sachan parlar la lenga nòstra »

Seriá melhor que lo jogaires siaguen occitanofòns mas se n’i a, los ai pas trapat e s’existisson, los esperam; seràn los benvenguts! Quand vau recrutar un jogaire, gaiti en primièr son nivel esportiu (CFA a DH). Apuèi parli amb el per saupre s’es estacat al país nòstre, a las nòstras culturas e tradicions, si se sentís occitan, amorós de son país. Per cada eveniment esportiu e acamp, mandi un glossari fotbolistic e lo vocabulari de la vida vidanta. Fasèm tot çò qu’es posible per que sachan parlar la lenga nòstra.

Cresètz que los occitans son receptius e lor agrada l’idèa d’aver una seleccion de fotbòl, quitament s’es pas oficiala?

Sai pas solament si los occitans sabon qu’una còla occitana de fotbòl existís. Fasèm un trabalh enòrme amb los mèdias per aquò. Pasmens tota la gent qu’encontram nos ditz qu’es una bona causa e un mejan de mai per far conéisser Occitània. Seleccion oficiala pot pas èsser: i a pas cap d’Estat Occitan, de Republica Occitana ni mai de Reialme d’Occitània! La legitimitat la tenèm pel biais dels que nos sostenon coma partenaris, es a dire lo Centre Inter Regional de Desvolopament de l’ OCcitan (CIRDOC), l’Institut d’Estudis Occitans (IEO) la region Miegjorn-Pirenèus, eca. Benlèu, un jorn, una federacion o una entitat occitana veirà lo jorn. Aital poirà s’aprofechar del trabalh qu’aurem fach.

Saunejatz al jorn que la seleccion occitana de fotbòl podrà jogar de partidas oficialas?

Avèm pensat en 2010 demandar nòstra afiliacion a la FIFA mas per aquò cal esser representat o reconegut a l’ONU. Demòra de camin ...

Avetz páur que los detractors de las seleccions esportivas non reconegudas pòscan ensajar de mesclar la politica amb l’espòrt per far mal a l’AOF? « Nos agrada mai jogar amb los Curds o los Lapons que contra Padània; mas tanben jogarem amb lo Tibet o lo Vatican sens gaitar l’aspècte religiós »

L’AOF s’implica pas en politica, ni mai pensi pas que quauqu’un ensage de mesclar la nòstra activitat esportiva e culturala amb un aspècte politic. I a de cops que jogam contra de còlas que defendon pas lo meteis objectiu que nautres, mas fasem abstraccion d’aquò perque volèm participar als tornègs importants per nos far conéisser e podèm pas elegir los adversaris. Segur que nos agrada mai jogar amb los Curds o los Lapons que contra Padània; mas tanben jogarem amb lo Tibet o lo Vatican sen gaitar l’aspècte religiós. Puslèu que de voler far mal a l’AOF, esperam que las instancias administrativas -es a dire los politics elegits que pel moment nos sostenon- nos ajuden a finalizar los projectes nòstres amb una pichòta subvencion.

Podetz avançar los prèps eveniments de la seleccion? Anaretz jogar al Curdistan? « Seleccion oficiala pot pas èsser: i a pas cap d’Estat Occitan, de Republica Occitana ni mai de Reialme d’Occitània! »

Per aquesta sason aviàm dos rescontres de preparacion: lo 29 de decembre contra la seleccion del Cilento (victòria nòstra 2 a 0 a Fontés) e lo 30 de març contra la seleccion Sami (Lapònia), campiona del mond dels territòris sens estat (Viva World Cup) en 2008 dins l’encastre de la protèsta per la lenga occitana al Stadium de Tolosa (terrenh annèx). Vesètz que l’AOF se prepara tre ara per las competicions de 2012. En primièr, la Viva Word Cup que se debanarà al Curdistan en Irac del 27 de mai al 3 de junh. Dins l’edicion de 2010 que se debanèt a Malta, Occitània perdèt 2 a 1 contra lo Curdistan en mièja-finala mas ganhet la pichòta finala per la 3ena plaça 2 a 0 contra lo Reialme de las doas Sicílias. Apuèi i aurà lo campionat d’Euròpa de las minoritats lingüisticas, l’"Europeada 2012" que se debanarà a Budyšin (Saxònia) del 16 al 24 de junh. Si l’objectiu per la Viva World Cup es la finala, l’AOF anarà a l’Europeada amb l’ambicion de la victòria finala per donar al país nòstre son primièr trofèu dins un tornèg màger.

I a pro de sòus per finançar tot aquò? « Seriá un brave crebacòr, ara qu’avèm una còla de primièra, de capitar pas aqueles eveniments per manca de finançament »

Per realisar aqueles projectes nos manca a l’ora d’ara quauques mejans financièrs. Es per aquò que prepausam a totes los que nos volon sostener de los associar a aqueles eveniments culturals e esportius. Vaquí lo contacte se desiratz de venir un de nòstres sostens o partenaris: Nicolau Desachy. Mai d’entresenhas sul siti www.occitania-fotbol.com. Seriá un brave crebacòr, ara qu’avèm una còla de primièra, de capitar pas aqueles eveniments per manca de finançament.

(JPEG)



 

 


Sèm a petaçar lo site
In-Play Sport Analysis
Reportage Canal + Viva World Cup 2012
COMMUNIQUE DE PRESSE 2 VIVA WORLD CUP
COMMUNIQUÉ DE PRESSE
COMUNICAT DE PREMSA OCCITANIA - SAPMI
DESACHY Nicolas entrevistat per FOOTMAG
AMIEL Didier entrevistat per FOOT34

 

 

sit realisat amb SPIP e JCIZZO.com Logicial liure jos licéncia GNU/GPL
© 2004 Realisacion - IGEDMEDIA